Cəhənnəmləşdirilmişlərdənik, yoxdur günah bizdə,
Bəli xəmləşdirilmişlərdənik, yoxdur günah bizdə.

Fəğan etsək belə pərvərdigarə naləmiz yetməz,
Səsi bəmləşdirilmişlərdənik, yoxdur günah bizdə.

Keçirsə ömrümüz qan tökmək ilə fani dünyada,
Bura cəmləşdirilmişlərdənik, yoxdur günah bizdə.

Sevincdən ağladıq gah, gah qəmdən oldu sel yaşlar,
Gözü nəmləşdirilmişlərdənik, yoxdur günah bizdə.

Nə eşq ilə yetişdik kamə, nə əql ilə şad olduq,
Ki sərsəmləşdirilmişlərdənik, yoxdur günah bizdə.

Yıxılmış gəlmişik dəhrə, bizi mey yıxmayıb, saqi,
Əzəl dəmləşdirilmişlərdənik, yoxdur günah bizdə.

Ya bu fani cahana qəm ilə biz gəlmişik, Arif,
Ya da qəmləşdirilmişlərdənik, yoxdur günah bizdə.

Zəmanədə

Gər qoymadıqsa mənəvi bir iz zəmanədə,
Aya, nə üzlə bəs yaşadıq biz zəmanədə.

Şeytan qədərdi insanə bənzərlərin gücü,
Şəfqətdən, ədldən əlini üz zəmanədə.

Naəhlə, nadürüstə qucaq açdı dəhri-dün,
Hər əyri göstərir özünü düz zəmanədə.

Billahi, indi qiyməti yoxdur kar olmağın,
Dişsiz qalan damaq kimidir söz zəmanədə.

Mən saqi dəf edəndə solumdan gəlir kədər,
Qoymaz fələk ki bir dəm açıb göz zəmanədə.

Arif, bu yerdə zikr elə Sahibzamanı ki,
Namərdə çökdürər o gəlib diz zəmanədə.